Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

MAJLINDA SHABANI (ALEKSANDRA)

          Një ndër krijimtaritë më të lëvruara të letërsisë shqiptare, është edhe POEZIA. Gjini e letërsisë ku bota e brendshme, ndjenjat më sublime, frymëzimi hyjnor...  shprehen përmes shkronjave të cilat krijojnë vargje... vargjet, pastaj, shpalosin mendime, mendimet krijojnë energji, energjia ndez dritat e dijës, rrezet e artë të së cilës i japin ngrohtësi zemrës, mendjes dhe shpirtit, e me këtë, edhe kuptim dhuratës më të shtrenjtë, vetë  jetës.

            Që nga Lekë Matrënga e Pjetër Budi, kjo energji nuk u ndalë asnjëherë së hedhuri farën e dijës, duke e kultivuar atë me dashurinë më të çiltër në shpirtin e pastër e fisnik të popullit shqiptarë. Duke i mposhtur të gjitha sfidat e kohës, kjo frymë e shpirtit të popullit, xixat e saja të arta, si një pishtar i shpresës, u bartën gojë më gojë, mendje më mendje, zemër më zemër... brez pas brezi... nga kokat më të ndritura të kombit si: Naimi, Çajupi, Mjeda, Asdreni, Shiroka... për të vazhduar tek Fishta, Konica, Noli, Migjeni... e deri në kohën tonë, duke u kthyer ai pishtarë në flakadan të përhershëm që tashmë nuk ka forcë në botë që mund ta shuaj fuqinë e zjarrit të tij...

            Dua ta falënderoj nga zemra mikun tim dhe poetin e mirënjohur, ADEM ZAPLLUZHA, që me përkushtim të jashtëzakonshëm, vizitorëve të kësaj faqeje, por edhe më gjerë, do t’ua prezantoj disa nga poetët më të njohur të kohës sonë, e me këtë, do e plotësoj e pasuroj edhe mozaikun e mrekullueshëm të letërsisë shqiptare.

(www.sa-kra.ch)

       Përgatiti: Adem ZAPLLUZHA

ANTOLOGJI E POEZISË MODERNE SHQIPE

MAJLINDA SHABANI (ALEKSANDRA)

            Hyrje

          Majlinda Shabani (Aleksandra) ka lindur në qytetin e Gjirokastrës Albania  dhe banon në këtë qytet.

            Ka përfunduar studimet e mesme ne shkollën e mesme të përgjithshme ”Siri Shapllo” në qytetin e lindjes si dhe Universitetin ”Eqrem Çabej”  Gjirokastër në Fakultetin e Shkencave shoqërore në Degën Ekonomik, duke u diplomuar për Kontabilitet – Financë.

            Është autore e librave poetikë:

            1. “Skulpturë dëshire në qiell manovrimi” ( Sculpture of desire in the  manouvring sky)2007  (Fituese e çmimit të parë për poezi, viti 2008);

            2.*“Scultura di pensiero nel ciclo di manovra” (*“Metamorfosi generativa”) poesia, 2012

            3. “Stilistika e lirisë” (Eklipsore e jetës, Hartografia e pikësimeve) 2015

            Ka në proces një libër me skicime dhe  një roman me temë sociale.

            Shqipërime :

            1. “Engjëjt ndaj urrejtjes“( TERESINKA PEREIRA “flet” shqip) , libër poetik i poetes amerikano-braziliane Teresinka Pereira, Presidente e IWA (Ohajo) SHBA,    dhjetor 2013

            Shqipëruese e  mbi 1000 poetëve  nga mbi 130 vende të Botës nga gjuhët: anglisht dhe italisht dhe përfshirja  e  tyre në Antologjinë poetike pegasiane, kolanë  “Korsi e   Hapur” 1, 2, 3 dhe në librin “Altari i Pegasit”, i cili është në proces.

            Përkthim në italisht dhe anglisht të  shumë librave poetike të autoreve vendas dhe të huaj, disa artikujve kritikë dhe vlerësim   nga kritika italiane si dhe të shumë librave nga anglishtja dhe italishtja në shqip. Mund të përmenden përkthimet në gjuhën shqipe të Nadia Cella - Pop (Rumani)  (duke qenë një nga përkthyeset e librit të saj shumëgjuhësh me poezi, botuar në Rumani), Florentin Smarandache (SHBA), Kuldeep K. Srivastava Indi, Tozan Alkan , Turqi e tjerë. 

            Pjesëmarrëse aktive në librin ”Pegasiada” 1 dhe 2, përkthimet e të gjitha materialeve kumtuese në Simpoziumet Ndërkombëtare dhe në Kongresin e Parë Ndërkombëtar të LNPSHA”PEGASI” ALBANIA.

            Redaktore librit për fëmijë ”Refleks në ujëvarë”...

            Po punon për përgatitjen e librit antologjik ”ALTARI I PEGASI” dhe ”PROZËPOETIKA UNIVERSALE” (“THE UNIVERSAL POETIC PROSE”).

            Disa nga krijimet e saj  janë  botuar në revista të ndryshme jashtë vendit si në: Greqi, Itali, Turqi, Rumani  e tjerë.

            Fituese e disa çmimeve ndërkombëtarë.

            E nominuar nga IBC ”Njeriu i vitit 2013”

            Ështw shpallur nga IWA,  SHBA ”Përkthyesja e Vitit  2014”

            E ftuar dhe pjesëmarrëse  në disa evenimente ndërkombëtare poetike: SHBA, Greqi, Francë, Fyrom, Maqedoni, Kosovë, Rumani e tjerë.

            Kontribut në pesë veprimtari ndërkombëtare, midis të cilave:

            Kongresi  i parë Ndërkombëtar ”Muza Poetike Pegasi – Vitrina 2012”, ku lojti edhe rolin e përkthyeses anglisht, italisht.

            Pjesë aktive  në katër Simpoziume Ndërkombëtare, në një Kongres Ndërkombëtar të  Letërsisë dhe në shumë veprimtari të tjera të  LNPSHA ”PEGASI“ ALBANIA  si:      Rrugëtim Profil  “PEGASI” INTERNACIONAL Tiranë ALBANIA, Prishtinë, Kosovë;

            “Poetët e   Kombit apelojnë ” Gjirokastër, Tiranë, Prishtinë, nëntor 2011;

            “Shtatë ditët e bukura të javës “ Tiranë, Gjirokastër, korrik 2012; “100.000 POETËT E BOTËS PËR NDRYSHIM” Tiranë, Gjirokastër, Fier e tjerë.

            Pjesëmarrëse në Manifestimin Poetik “FLAKANDANI I KARADAKUT”, mars 2012;     

            Manifestimi poetik  “ TAKIMI NËN RRAP’” Shkup, Tetovë,  Fyrom 2009;             Manifestim poetik  “JONIANËT” Sarandë, shtator  2009;

            Veprimtaria e madhe “DITET E PLEJADES” në bashkëpunim me bashkinë e Ersekës, gusht 2012;  me bashkinë e Fierit shtator  2012;

            Veprimtaria përmastive  “DITET E PLEJADËS”në Prishtinë , Kosovë, nëntor  2012;

            Në të gjitha veprimtaritë ka dhënë ide dhe kontribut.

            Kryeredaktore e gazetës letrare ”PEGASI” e Lidhjes së Krijuesve; e gazetës  “PEGASI” e LNPSHA ”PEGASI” ALBANIA, e revistës ’’Pegasi” dhe ”Pegasi, Bukuria dhe Shëndeti në fokus”;

            Është iniciatore e veprimtarive shkrimore për letërsinë për fëmijë dhe impulsuese e veprimtarisë ”PEGASI dhe letërsia për fëmijë”

            Ka qenë kryeredaktore e mjaft gazetave të botuara të nxënësve të shkollave  9 vjeçare të Gjirokastrës si: ”Impuls”, ”Çiltër”, ”Sprova”e tjerë, duke trajtuar probleme të të drejtave  të fëmijëve në shkrime të zhanreve të ndryshme.

            Anëtare e I.W.A (Lidhja e Shkrimtarëve dhe Artistëve Ndërkombëtare OHAJO SHBA; W.P.S Lidhja e Poetëve Bashkëkohorë të Globit; Anëtare e UPLI, SHBA dhe e LNPSHA “PEGASI” ALBANIA; veprimuar në Balkan Amfiktionia - Association  of Young  People of Balkan, (Shoqata Ballkanike e NJERËZVE TË RINJ TË BALLKANIT) në projektin me 127 vende të Botës: “Për vëzhgim të botës shpirtërore të të rinjve”.

            UNDP SHQIPËRI  ”Promovimi i ndërkulturalizmit per minoritetet në Shqipëri”, qershor 2006:

            ”Barazia gjinore” UNDP Shqipëri” korrik 2005:

            Pjesëmarrëse në dhënie mendimesh dhe debatet ekonomike në forumin bashkimi kombëtar www.bashkimikombëtar.com;

            Moderatore e web  www.pegasiworld-al.com

            Anëtare e disa Shoqatave të Shoqërisë Civile në Trevat e  Jugut të Shqipërisë.

            Anëtare e  Fondacionit ”NËNË TEREZA”

            Anëtare e Këshillit Koordinativ të Shoqërisë Civile të Trevave  të Jugut të Shqipërisë...

            Është Z/vendës Sekretare e Përgjithshme e LNPSHA”PEGASI” ALBANIA;

            Anëtare e AKADEMISË ALTERNATIVE PEGASIANE.

HARTOGRAFIA E PIKËSIMEVE

PIKËÇUDITËSET :

Dëshira nyjesh këputura

Ngujime brenda retorikave,

Thirrmave të paheshtura,

e nxitëseve të vullneteve!

Pikëpyetjet:

Litarë hedhur mbi shpina

turmave të pyetjeve,

Monopate dialogjesh,

në stacione pritjesh,

për ajkime përgjigjesh!

Pikëpresjet :

Ndalesa të shkurtra,

në kinematografitë e fjalive,

shfaqje horizontale të dubleve!

Kllapat:

Karfica të ndjenjave njerëzore,

Limitet e një grimce të paprekshme,

prekjet e planetit Tokë!

Tre pikat:

Gjymtyra të rrugëtime

të shkallinave të përjetësive…

Presjet:

Pika referimi me vendndodhje,

grumbuj homogjene ndjesish,

pauzat e një udhe brenda botës!

Dy pikat :

Lajmëtare të shembujve,

mikpritëse të fenomeneve

burimor dhe origjinues!

Thonjëzat:

Thekset e ekzistencave,

dhe pikut të inekzistencave.

Vizat:

Pauza në trenat e kohës!

Pikat :

Kontemplacione të pangjashme,

në ngurtësimet e një stop-fundësie,

në konotacione rruzullore!

REFRENE DASHURISH NË PARTITURA JASHTËTOKËSORE

I ëmbli kokteil dashurie,

në gishtërinjtë e buta të ëndrrës,

i rroku të gjitha stinët brenda vetes,

të dehen me nuanca eliksiri!

Meloditë e ngurta thellohen,

në pragjet e ngadalta të heshtjeve,

brendësive të një kambane pritjeje!

Ura e largësive,

rrugëtimi i pakohësisë së botëve,

përhumbur verbërive të mjegullave.

Ndjenjat pikturime,

në dimensione lakuriqe,

si vargmale të veshura

me puthje ëndrra kuqe!

Në qelizat frymuese shpirtrash,

përmes boshtit të çasteve

artëzohen në ngjyrime miniaturash :

Universe Pikëtakimi!

Diku, në Tempullin e një fati,

Kumbimet e lutjeve

rreshur dallgëve të jehonës,

për një shpresë agu,

ngjizur në të, refrene dashurish…!

18.02.2015

PËRKUFIZIMET KOHORE TË VARGUT

Vargu i parë : Vetvetja.

Vargu i dytë : Vetja e Tij.

Vargu i tretë : Dy vetvetet,

Në Mendime të Rastësishme…!

Vargu i parë : E kaluara.

Vargu i dytë : E tashmja.

Vargu i Tretë : E ardhmja.

Në kohë të rastësishme….

PASQYRË E PËRTHYER PËRTEJ PASQYRËS REALITETI +1...

Një ëndërr çudit veten

në pasqyrë...

Në dimensione të shkruara apo të pashkruara

e lind një jetë të re...

Një jetë lartësohet në këmbë...

Brenda saj pikturuar penelave,

dhimbës apo gëzues,

unë apo ti, duke soditur tablon e pasqyrës...

Thua përshfaqet një dhuratë

ndërthurrur më shumë,

sesa një realitet...

Një realitet hap sytë në mëngjes...

e veç përndjek me sytë e tij ditën

apo natën...

lindjen apo perëndimin,

këngën apo vajin,

njeriun apo anti – njeriun,

Zotin apo djallin...

Pozon para pasqyrës,

mbërthen këmisha me shumë kopsa njerëzore,

shtrënguar pas trupit të tij

stilohet me veshje të thjeshta,

por dhe madhështore.

Shumë veshje në grilat e hijes

apo të dritës,

pyetur veten si ngjan...

Duke ngultësuar vështrimin

në drejtim të pasqyrës,

në kontraste fjalësh apo dashurish...

Kur përgjumet mbrëmja sytë hedh

takuar me pasqyrën ,

dhe një herë tjetër sërish,

mbetur vetja e përthyer me pasqyrën...

Realiteti jemi ne,

i kundërti i asaj antirealiteti...,

pjesa përtej pasqyrës, bota më e errët...

njohja e një realiteti tjetër +1...

* * *

Lejojeni diellin

t’i djegë epigramet

e ëndrrave të mia!

Mos i ndalni

fatet e tyre!

Presjet prodhojnë

lindje të reja!

* * *

Poezitë, të pafjeturat

djepave të ekzistencave;

nën lëkurat e agimeve,

tjerrin frymimet,

në galaktika shpirtrash!

* * *

Prej formave

ekzistenciale poetike

ti, mozaiku i poezisë,

gjithë të tjerat, muza,

blice shkreptimash

brendësive

çprangosur

qelive inekzistenciale,

etjeve drejt lirisë!

Marrë nga vëllimi “Stilistika e Lirisë”(Hartografia e pikësimeve) 2015

LAKURIQËSIA E BOTËS

S’e kuptoj

çfarë po ndodh brenda meje,…

Bota ime e ndezur në konflikt

në konfuzion e kontrakditë;

një urrejtja më gërryen,

dashuria më bren për ty?

Çfarë je vallë iluzon,

Fiksim,

Mendim

apo Tablo e pikturuar

pa penelë artisti, 

e varur kokëposhtë

në një atelie, ku kanë zhgarravitur

të talentuarit dhe meitët?

Dua ta zbuloj …

Por e vërteta

zbulon lakuriqësinë  e saj,

mbetet e skalitur

në kujtimin e Kohës

dhe njolla më zmadhohet

duke prodhuar vetëm errësirë…

Ku ta gjej ditën?!

PIKE ARITMI KALIMTARE

Kaplim asfiksie në hemisfera gjoksi,

ndjenja prek fluksin e pafundësisë – rrahje;

vërtitje mendimesh sfidues,

rrëmbues,

pushtues fitoresh të pamohueshme.

Një zbulim mendimor me karfica risish

kapërcen shkallën e ëndrrës.

Duhet çrrënjosur slogani :

”Në pikun e jetës,

kënaqësia ndesh në aritmi kalimtare”.

29. 07.2005

GJYSMAT

Luani është i çmendur,

në dhëmbët e tij të “bronztë”

shtrëngon një zemër…

Gjysma e saj e kuqe gjak,

gjysma tjetër e bardhë…

Luani  vrapon çmendurisht

pa iu bindur rregullave

të ecjes, vrapimit,

i kënaqur nga zemra dyngjyrëshe

imja – jotja…

Ç’shenjë zoodiakale ka Luani

që herë shfaqet peshk,

herë dem 

e herë Gaforre…