Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

ILIAZ BOBAJ

          Një ndër krijimtaritë më të lëvruara të letërsisë shqiptare, është edhe POEZIA. Gjini e letërsisë ku bota e brendshme, ndjenjat më sublime, frymëzimi hyjnor...  shprehen përmes shkronjave të cilat krijojnë vargje... vargjet, pastaj, shpalosin mendime, mendimet krijojnë energji, energjia ndez dritat e dijës, rrezet e artë të së cilës i japin ngrohtësi zemrës, mendjes dhe shpirtit, e me këtë, edhe kuptim dhuratës më të shtrenjtë, vetë  jetës.

            Që nga Lekë Matrënga e Pjetër Budi, kjo energji nuk u ndalë asnjëherë së hedhuri farën e dijës, duke e kultivuar atë me dashurinë më të çiltër në shpirtin e pastër e fisnik të popullit shqiptarë. Duke i mposhtur të gjitha sfidat e kohës, kjo frymë e shpirtit të popullit, xixat e saja të arta, si një pishtar i shpresës, u bartën gojë më gojë, mendje më mendje, zemër më zemër... brez pas brezi... nga kokat më të ndritura të kombit si: Naimi, Çajupi, Mjeda, Asdreni, Shiroka... për të vazhduar tek Fishta, Konica, Noli, Migjeni... e deri në kohën tonë, duke u kthyer ai pishtarë në flakadan të përhershëm që tashmë nuk ka forcë në botë që mund ta shuaj fuqinë e zjarrit të tij...

            Dua ta falënderoj nga zemra mikun tim dhe poetin e mirënjohur, ADEM ZAPLLUZHA, që me përkushtim të jashtëzakonshëm, vizitorëve të kësaj faqeje, por edhe më gjerë, do t’ua prezantoj disa nga poetët më të njohur të kohës sonë, e me këtë, do e plotësoj e pasuroj edhe mozaikun e mrekullueshëm të letërsisë shqiptare.

(www.sa-kra.ch)

       Përgatiti: Adem ZAPLLUZHA

ANTOLOGJI E POEZISË MODERNE SHQIPE

ILIAZ BOBAJ

           Hyrje

          Iliaz  Bobaj u lind në fshatin Lazarat të Rrethit të Gjirokastrës, në një familje me tradita atdhetare dhe kulturore.

            Shkollën fillore e filloi në vendlindje, por e vijoi dhe e përfundoi në qytetin e Delvinës, ku u shpërngulën familjarisht. Në qytetin e Delvinës përfundoi edhe shkollën e mesme.

            Ka kryer studimet e larta për matematikë dhe fizikë në Institutin e Lartë Pedagogjik të Shkodrës dhe në Universitetin ''Eqerem Çabej'', në Gjirokastër, po në këtë degë.

            Ka punuar mësues në rrethet e Sarandës, Delvinës, drejtues shkolle në qytetin e Delvinës, drejtues i Shtëpisë së Pionierit Delvinë dhe gjatë viteve 1992-1997 ka kryer detyrën e Sekretarit të Këshillit të Rrethit te Delvinës. Prej vitit 1997 ka emigruar së bashku me familjen e tij në qytetin e Patrës, (Greqi), ku jeton edhe sot. Është i martuar dhe ka dy fëmijë.

            Me krijimtari letrare është marrë që në bankat e shkollës, duke botuar në organet e shtypit të kohës fabula, poezi, (për të rritur dhe për fëmijë), epigrame, tregime, (për të rritur dhe për fëmijë), përkthime dhe publicistikë.

            Është poet, shkrimtar, fabulist, humorist, eseist, publicist dhe përkthyes.

            Është autor i librave:

            1. Dora dhe faqja (fabula).

            2. Dhelpra dhe gjyqtari (fabula),

            3. Jetën e pres si të vijë (poezi).

            4. 501 fjalë të urta (fjalë të urta).

            5. Molla e sherrit (fabula).

            6. Legjenda e Syrit të Kaltër (legjendë për fëmijë).

            7. Tregu i fjalës (epigrame).

            8. Dino Buzzati ndalohet në doganë (tregime satirike).

            9. 777 fjalë të urta (fjalë të urta).

            10. Testamenti i bukurisë (poezi).

            11. Rrëfimet e një nate kthimi (esse).

            12. Kali i pushtetit (fabula, poezi satirike, epigrame).

            13. Poezitë e fqinjëve të jugut (antologji poetike).

            14. Zogjtë e ballkonit tim (poezi për fëmijë).

            15. Ditën e artë e shkoj me ty (poezi).

            16. Legjenda e Butrintit (legjendë për fëmijë).

            17. Bota është e madhe shumë...(poezi për fëmijë).

            18. Është pikërisht kështu (tregime satirike).

            Është autor i disa përkthimeve:

            1. Ezopi (vepra e plotë,fabula).

            2. Harta e grisur (Ali Podrimja, poezi, greqisht).

            3. Plaga e dhjetë me hënën (Kalosh Çeliku, poezi, greqisht).

            4. Në detin e bukurisë (Panajota Zalloni, poezi, shqip).

            5. Etje për qiell, (Panajota Zalloni, poezi shqip- greqisht).

            6. Dashuri në Butrint (dramë, Dino Kubatis, shqip).

           7. Këpucët e Van Gogut, (tregime, Kostas Valetas, shqip, libër fitues i Çmimit Letrar Ndërkombëtar: ’’Kepi i Shpresës së Mirë- Fahredin Gunga’’, për vitin 2011, Prishtinë).

            8. Drita e Lesbos (tregime, Kostas Valetas, shqip).

            9. Nëna Shqipëri (dramë, Dino Kubati, shqip)

            10. Agim Gjakova (poezi, greqisht).

            11. Agim Vinca (poezi, greqisht).

            12. Mujo Buçpapaj, (poezi, greqisht).

            13. Gjërat e harruara, Jeton Kelmendi, (poezi, greqisht).

            14. Abedin Pasha Dino, poezitë e tij dhe Dinot e tjerë (Niko Stylos, studim, shqip).

            15. Kavafis- Seferis- Elitis ( antologji poetike, shqip).

            Ka përkthyer në shqip pjesë nga veprat e autorëve të mëdhenj botërorë, (midis tyre edhe nobelist), si: Azis Nesin, Mark Tuein, Gi Dë Mopasan, Anton Çehov, Krillov, Sabiel, Xhovani Soresi, Klod Arno, Jorgos Seferis, Odiseas Elitis, Konstandinos Kavafis, Sapfo, Qiqi Dhimulla, etj.

            Ka përkthyer në gjuhën greke pjesë nga krijimtaria e poetëve të njohur shqiptarë: Ali Podrimja, Agim Gjakova, Agim Vinca, Mujo Buçpapaj, Kalosh Çeliku, Jeton Kelmendi, Muharrem Kurti, Mentor Hoxha, etj.

            Krijimtaria e tij letrare është përfshirë në disa antologji poetike brenda dhe sidomos jashtë atdheut.

            Po ashtu krijimtaria e tij është botuar në shqip dhe në gjuhë të tjera në disa vende të botës, si në Angli, Rumani, SHBA, Greqi, Kosovë, Spanjë, Suedi, Turqi, Itali, Mali i Zi, Maqedoni, Maltë, Meksisë, Kinë, etj, ku ka marrë edhe çmime të ndryshme letrare.

            Disa nga librat e tij janë rekomanduar për programin mësimor në degët e gjuhës shqipe në Universitete brenda vendit dhe në degët e Albanologjisë jashtë vendit.

            Boton në shumë organe (shqip dhe në gjuhë të huaja), brenda dhe jashtë vendit.

Përkthen nga gjuhët :greke, ruse, italiane, angleze.

            Është fitues i mjaft çmimeve letrare,(brenda dhe jashtë vendit),për krijimtarinë e tij letrare dhe për përkthime.

            Është organizator dhe pjesmarrës aktiv në veprimtari letrare-artistike, si brenda vendit, ashtu edhe në ato ndërkombëtare.

            Është veçanërisht i lidhur me vendlindjen e tij, Lazaratin, me atdheun, me hapësirën mbarëshqiptare dhe me problemet e emigracionit shqiptar në Greqi, duke qenë njëherësh edhe një zë i fuqishëm në përkrahje të tyre dhe të problemeve që ata kanë dhe një ndër publicistët më të njohur dhe më të lexuar aty.

            Është Anëtar i Redaksisë së Gazetës LAZËRATI dhe i Plus Gazeta Athina, (gazeta më e madhe shqiptare në Greqi).

            Është Anëtar i Shoqatës së Intelektualëve Shqiptarë ''FJALA  E  LIRË'',(Londër).

            Është Anëtar i Lidhjes së Shkrimtarëve të Shqipërisë.

            Është Anëtar i Shoqatës së Shkrimtarëve për Fëmijë dhe të Rinj të Shqipërisë.

            Është Anëtar i Shoqatës së Gazetarëve Profesionistë të Shqipërisë.

            Është Reporter i Radio Sarandës në Greqi.

            Është Anëtar i Shoqatës Botërore të Shkrimtarëve (W.P.S).

            Është Anëtar i PEN-CLUB të Greqisë (nën kujdesin e UNESKO-s).

            Është ‘’Anëtar Nderi’’ i Shoqatës së Shkrimtarëve Shqiptarë ‘’Dega e Blertë’’,  Selanik.

            Është ‘’Kryetar Nderi’’ i Shoqatës së Shqiptarëve të qytetit te Patrës, Greqi.

            Disa nga Çmimet Letrare të fituara nga ky autor janë:

            1. Medalje e Artë e UNESKOS, ’’Aleksandri i Madh’’, Dega e Greqisë, 2013 dhe nga Shoqata Kulturore Ndërkombëtare ‘’Kafeneja e Ideve, Salaminë’’, për kontribut të shquar në fushën e letërsisë.

            2. Çmimi Special: ‘’Leka i Madh’’, i Lidhjes së Shkrimtarëve Shqiptarë të Maqedonisë, 2010 (Medalje Argjendi).

            3. Çmimi për kontribut në pasurimin e letërsisë shqipe, dhënë nga Lidhja e Botuesve Shqiptarë (2003).

            4. Çmimi i Dytë Kombëtar për libret tablloje muzikore, dhënë nga Televizioni Shqiptar (1989).

            5. Çmimi i Nderit, dhënë nga Lidhja Europiane e Kritikës Letrare (2013).

            6. Çmimi i Parë për librin humoristik të vitit 2012, dhënë nga Lidhja e Shkrimtarëve Shqiptarë, Maqedoni.

            7. Çmimi Kulturor Letrar, për kontribut të shquar në fushën e letërsisë, dhënë nga Shoqata Kulturore Mbarëkombëtare ‘’Ismail Qemali’’ dhe Biblioteka Publike ‘’Shefqet Musaraj’’, Vlorë 2011.

            8. Çmimi: ‘’Përkthyesi i vitit 2010’’, dhënë nga Lidhja e Shkrimtarëve Grekë ‘’Ksasteron’’ dhe revista letrare ‘’Qeleno’’.

            9. Çmimi i Parë, dhënë nga Shoqata Kulturore Ndërkombëtare ‘’Kafeneja e Ideve’’, Salaminë,  2011.

            10. ’’Mirënjohje, për kontribut të shquar në fushën e përkthimeve letrare’’, dhënë nga Shoqata Studentore Shqiptare Athinë (2011).

            11. Çmimi i parë, dhënë nga Galaktika Poetike ‘’ATUNIS’’,  2013.

            12. ‘’Mirënjohje për kontribut të shquar në Mitingun Poetik të Gjakovës’’, dhënë nga Klubi ‘’Gjon Nikollë Kazazi’’, Gjakovë, 2014.

            13. Çmimi i Parë në Mitingun e 50- të Poetik të Gjakovës, 2014.

            14. Diplomë Nderi, dhënë nga Shoqata Ndërkombëtare ‘’Arti pa kufinj’’, Sarandë 2014.

1. ME TY

Sa çel mëngjesi, bëhem tjetër,

s’më mban shtëpia kurrsesi,

më merr nxitimi, më nxjerr jashtë,

e di, pas portës më pret ti.

Midis vetmisë e shkove natën,

duke dihatur ankth e shpresë,

e gjithë në pritje e shndërruar,

gjersa të vijë sërish mëngjes.

Dita është jona: një parajsë,

që s’mund të na i prekë njeri,

në dehje rrojmë të dy bashkë,

sa të vijë mbrëmja përsëri.

Aty pas portës sapo mbërrijmë,

ti shndërrohesh, pritje bëhesh prapë,

unë brenda hyj, ku tjetra pret,

ta shkoj me të natën e gjatë.

Dyzuar si në një legjendë,

jetoj me këtë rregullsi:

me tjetrën shkoj natën e zezë,

ditën e artë e shkoj me ty.

2. EMRI

E mbaroi Farin e famshëm të Aleksandrisë.

Mbi gurët e tij,

gdhendi emrin e vet:

‘’Sostrati, i biri i Deksifanit nga Knida’’.

Gurët i veshi me pelerinën e suvasë,

mbi suva,

shkroi me shkronja të mëdha emrin e mbretit.

Erdhi dita, suvaja ra,

si lëvozhga prej frytit të pjekur,

bashkë me të,

ra edhe emri i mbretit.

Në Far mbeti emri i arkitektit.

3. TROJA

E patundur qëndron në histori.

Bie atëherë kur duhet të ringrihet.

Ngrihet atëherë kur duhet të bjerë përsëri.

4. KALI I EGËR

E ndanë nga tufa e kuajve të egër,

i kufizuan rreptësishtë lirinë

dhe i mësuan me durim

mjeshtërinë e nënshtrimit,

me mjetet e forta të dobësisë së tyre:

litarin, frerët, thuprën, samarin.

Kali kujtonte kohën e jetuar,

kur çati kishte qiellin,

me varkat e lehta të reve mbi krye,

hingëllimën në telat e violinës së ajrit,

ritmin e trokut mbi daullen e tokës,

që nxirrte nga thundrat yje,

pelat flatruese si fluturat e malit,

mbi mozaikun e butë të lulnajës.

Gëzimit të jetës së shkuar,

i thithte me etje pikëllimin,

aty ku liria e kishte harruar,

të lidhur me prangat e litarit.

Njerëzit, me kënaqësinë e tyre,

reklamonin robërimin e kalit.

5. PARA VARRIT TË FAMILJES SË ADEM JASHARIT

Pranë njëri – tjetrit rrimë të dy palët.

Flasin të vdekurit.

Heshtin të gjallët.