Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

BURHANEDIN XHEMAILI

          Një ndër krijimtaritë më të lëvruara të letërsisë shqiptare, është edhe POEZIA. Gjini e letërsisë ku bota e brendshme, ndjenjat më sublime, frymëzimi hyjnor...  shprehen përmes shkronjave të cilat krijojnë vargje... vargjet, pastaj, shpalosin mendime, mendimet krijojnë energji, energjia ndez dritat e dijës, rrezet e artë të së cilës i japin ngrohtësi zemrës, mendjes dhe shpirtit, e me këtë, edhe kuptim dhuratës më të shtrenjtë, vetë  jetës.

            Që nga Lekë Matrënga e Pjetër Budi, kjo energji nuk u ndalë asnjëherë së hedhuri farën e dijës, duke e kultivuar atë me dashurinë më të çiltër në shpirtin e pastër e fisnik të popullit shqiptarë. Duke i mposhtur të gjitha sfidat e kohës, kjo frymë e shpirtit të popullit, xixat e saja të arta, si një pishtar i shpresës, u bartën gojë më gojë, mendje më mendje, zemër më zemër... brez pas brezi... nga kokat më të ndritura të kombit si: Naimi, Çajupi, Mjeda, Asdreni, Shiroka... për të vazhduar tek Fishta, Konica, Noli, Migjeni... e deri në kohën tonë, duke u kthyer ai pishtarë në flakadan të përhershëm që tashmë nuk ka forcë në botë që mund ta shuaj fuqinë e zjarrit të tij...

            Dua ta falënderoj nga zemra mikun tim dhe poetin e mirënjohur, ADEM ZAPLLUZHA, që me përkushtim të jashtëzakonshëm, vizitorëve të kësaj faqeje, por edhe më gjerë, do t’ua prezantoj disa nga poetët më të njohur të kohës sonë, e me këtë, do e plotësoj e pasuroj edhe mozaikun e mrekullueshëm të letërsisë shqiptare.

(www.sa-kra.ch)

       Përgatiti: Adem ZAPLLUZHA

ANTOLOGJI E POEZISË MODERNE SHQIPE

BURHANEDIN XHEMAILI

            Hyrje

            U lind më 28.02.1962. Shkollimin fillor dhe të mesëm e ka kryer në Kumanovë, ndërsa Fakultetin Filologjik, Dega Gjuhë dhe Letërsi Shqipe më 1988 në Shkup. Ka ndjekur edhe studimet pasuniversitare në Letërsi...

            Ka punuar profesor i Gjuhës dhe Letërsisë Shqipe në shkollë të mesme, ndërsa tani është pranuar Këshilltar Shtetëror në Sekretariatin për Implementimin e Marrëveshjes sё Ohrit, që të transferohet në Ministrinë e Kulturës...

            Dy mandate ka drejtuar Klubin e Shkrimtarëve ”Jehona e Karadakut” dhe përsëri është Kryeredaktor i Revistës “Doruntina” organ i klubit të shkrimtarëve.

            Ka botuar:

            1. “Drita e vonuar’’ poezi 1993

            2. “Frikë nga liria” tregime 1994

            3. “Portrete të djegura” dramë, Revista STILI ’97 Nr.7, 1999

            4. “Tingujt e jetës” tregime 2001

            5. “Kambanat e lirisë” poezi 2003

            6. “Magjia moderne’’ tregime dhe novela 2005

            7. “Rruga e ndjenjave” roman 2006

            8. ”Në fund të tunelit” tregime 2011

            9. ”Ëndrra e zgjuar brenda syve” poezi 2013

            10. ”Nga ëndrra në ëndërr/ Din vis în vis” poezi në rumanisht 2013

            11. ”Portrete të djegura” dramë 2015

            Po ashtu ka botuar edhe shkrime publicistike, ese, vështrime letrare dhe recensione... Poezi dhe tregime i janë përkthyer në maqedonisht, kroatisht, rumanisht, anglisht...

DY MIJË VJET TË KËRKOVA

nëpër detet e trazuar

të kërkova

sytë më lotuan nga uji i zi

nëpër fusha male botës udhëtova

dasmat vdekjet s’pushuan

të kërkova edhe në varrezat

e stërgjyshërve

në kozmos yjet duke numëruar

hënën duke shikuar

të kërkova

atje plot kërpudha moderne

nëpër gazeta TV

kahmos të kërkova

do të të kërkoj

deri në fund

edhe nëse format e kërpudhave

bëhen realitet

ÇASTE VETMIE...

Nata e matur

me vetminë e fjetur

shkundi retë e zeza

mbi xhamin e dritares

dhe zgjoi heshtjen time

t’ plandosur,

gjersa shikoja portretin e kthyer

n’ albumin e kujtimeve të zgjedhura

që m’ kthenin në kohën e shkuar,

e zëri i humbur

brenda labirinteve të harresës

m’ lëvronte shpirtin

me pyetjet e pareshtura

e nuk më çelte portat e mundësive

të mbyllura me rraptimë shiu...

HERETIKËT

1.

Në këtë heshtje të ngurosur

heretikët po gufojnë përbrenda

si uji i kazanit që vlon e nuk tymon

e magjistarët modern mbi avull magjie

po shpikin formulime të reja

për devijimin

që po merret për lavdi

e lavdia për çmendi...

2.

Në këtë kohë të kthyer

pa orë e matës,

po zihen mes veti

idetë e mbrapshta

me engjëjt e heshtur

matanë zjarrit

që na djeg shputat e këmbëve

të lëshuara në lumin e akullt,

e dallkaukët duartrokasin

në sheshin e shtrigave

kur defilon mashtrimi

dhe humbet besimi...

ZËRI I LARGËT

1.

Ngado që shkoj

më ndjek zëri shpotitës

që dënes e qorton,

e kthehet buzagaz

kur ndjehem keq

dhe nuk di kah t’ia mbaj

e dikush më jep mend

si ta kaloj mjegullën

te porta dritëshuar...

2.

Terr është

nëna ime e dashur

e dikush m’ thotë

bëhu zjarr,

dhe lëvize gurin e djegur

për t’i thyer qafën

territ me një sy

që m’ pret gojëhapur

e nuk e shoh

çfarë forme ka...

KOHË E SHKUAR

Një fjalë e shkruar

në xhamin e thyer të dritares

me shikim nga dielli

rrinte në vetmi të harruar,

e ballkoni i mbuluar

me rrjetin e merimangës

na përkujtonte mosbesimin

e kohës së shkuar...

Në këtë heshtje të humbur

zukama e mizave të tërbuara

irritonte macet e mëhallës

që luanin me topin e shpuar

tangon e dëshpërimit,

e nuk ishte vjeshtë mërzie

as njeri s’ kishte vdekur,

por heshtja matej me hijen e vetë

gjersa drita ia dha këngës...