Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

Shkruan:Kastriot MYFTIU

Shendeti Natyral

SI TË KUJDESEMI PËR FLOKËT

            Flokët rriten 12-15 centimetra në vit. Megjithatë, dieta dhe stili i jetesës, stresi, ekspozimi i tepruar ndaj diellit, ndotësit, gjenetika, mungesa e gjumit, prishja e balanës hormonale, mungesa e vitaminave, sëmundje dhe ilaçe të caktuara mund të heqin lëndët ushqyesve kryesore dhe proteinat nga flokët, çka shkakton ngadalësim në rritjen e flokëve ose rënie të flokëve.

            Flokët janë kurora e bukurisë njerëzore, prandaj kur shohim krehrin të mbushur me flokë të rënë, na bën të ndjehemi keq. Këshillohemi me miq, mjekë, të moshuar, kërkojmë në internet për lloj-lloj kremërash.

            Për kujdesin për flokët janë shkruar libra të tërë, por unë nuk do të merrem me pjesët përbërëse të flokut, sidomos të rrënjës, tre fazat (anagjene, katagjene dhe telogjene) të rritjes dhe rënies së flokëve, apo 3 tipet e klasifikimit Ludwig të rënies së flokëve tek femrat. Nuk do të shkruaj për llojet e rënies së flokëve (alopecia armata, telogen effluvium, alopecia androgjenetike). Po kështu, recetat popullore për kujdesin për flokët janë pa fund, sidomos me vajra esencialë si ai i amlas, trëndafilit, limonit, kamomilit, rozmarinës, trumzës, apo dong quai, saw palmeto, fo ti (who shou), henna, lëngu i barit të grurit, etj. Por unë po shkruaj për ato që mendoj se janë më të lehta për t’u aplikuar, me produkte që mund t’i gjeni lehtësisht. Ndërkohë, ju mund të kontribuoni me receta të tjera popullore.

            SHKAQET KRYESORE TË RËNIES SË FLOKËVE

            Normalisht flokët rriten 12-15 centimetra në vit. Megjithatë, dieta dhe stili i jetesës, stresi, ekspozimi i tepruar ndaj diellit, ndotësit, gjenetika, mungesa e gjumit, prishja e balanës hormonale, mungesa e vitaminave, sëmundje dhe ilaçe të caktuara mund të heqin lëndët ushqyesve kryesore dhe proteinat nga flokët, çka shkakton ngadalësim në rritjen e flokëve ose rënie të flokëve. Shkaqe të tjera janë shtatzënia dhe periudha pas lindjes së fëmijës (për shkak të mangësive ushqimore që shoqërojnë këtë fazë), tifoja, temperatura e lartë për një kohë të gjatë, etj.

            Kryesori është stresi sepse ai cenon të gjitha funksionet e trupit dhe pasqyrohet shumë shpejt në gjendjen e flokëve, sepse flokët kanë nevojë për rinovim. Shkak janë edhe trajtimet e flokëve me kimikate të forta. Kimikatet e shumta shpesh helmuese në xhelet / gellet dhe shampot mund të mos përshtaten me flokun dhe lëkurën tuaj. Edhe kimikatet në ujin me të cilin lahemi në shtëpi mund të sjellin rënien e flokëve.

            SI MUND TË KUJDESEMI VETË PËR FLOKËT?

            USHQIMI DHE MËNYRA E JETESËS

            Kjo është një temë më vete prandaj nuk po zgjatem. Kryesorja është të thuhet se rritja e konsumimit të proteinave mund të ndalojë rënien e flokëve. Proteinat e dobishme për flokët janë ato të mishit të kuq, peshkut dhe mishit të pulës. Vegjeterianët duhet të konsumojnë bulmetra, arra dhe thjerrëzat / lentile. Gratë shtatzëna kanë nevojë për më shumë proteina se zakonisht.

            PINI UJË

            Pini të paktën 2.5L në ujë 3L çdo ditë. Uji e ndihmon trupin të pastrojë helmet. Helmet dhe ndotësit që marrim në trup pengojnë shëndetin e flokëve.

            VITAMINAT

            Për të ruajtur shëndetin e flokëve nevojiten vitaminat B6, A dhe E. Ushqimet që përmbajnë këto vitamina janë specat e kuq dhe jeshil, arrat, bulmeti, perimet jeshile, veza, mëlçia (në Kosovë i thonë gabimisht mushkëritë), frutat dhe perimet e verdha. Mos u lodhni shumë me dietën, mjafton të hani një dietë përgjithësisht të shëndetshme dhe të ekuilibruar.

            ÇFARË MUND TË BËNI VETË?

            Në fakt, hapi i parë për rritjen e flokëve është të parandalohet rënia e flokëve. Merrni këto masa të thjeshta dhe të efektshme në komoditetin e shtëpisë tuaj për të pasur flokë të shëndetshme.

            SHMANGNI THARËSET E FLOKËVE

            Përdorimi i tharëses së flokëve është një tjetër faktor për rënien e flokëve. Lërini flokët të thahen vetë. Lajini flokët para se të nxitoni për të dalë jashtë. Tharësja e dëmton flokun dhe rrënjën. Edhe fërkimi ashpër i kokës me peshqir i dëmton flokët; kur janë të lagëta, flokët dobësohen dhe bien më bien lehtë.

            MASAZHI

            Është mënyra më e thjeshtë. Ai stimulon rrënjët e flokëve. Masazhin mund ta bëni me vaj ose pa vaj. Bëjini masazh kokës me majën e gishtave. Mund të përdorni vaj kokosi, vaj ulliri ose vaj bajameje / bademi. Masazhi i kokës 15 minuta çdo ditë pakëson rënien e flokëve. Masazhi i përditshëm përmirëson qarkullimin e gjakut në lëkurën e kokës. Masazh mund të bëhet edhe kur lajmë kokën me shampo.

            VAJI I ULLIRIT

            Në rast se keni flokë të hollë, bëni masazh me vaj ulliri në lëkurën e kokës. Rekomandohet që vaji i ullirit të hiqet pas 6-8 orësh për efekt më të mirë.

            VEZA

            E përbërë nga rreth 3,6-6,5 gram proteina, veza ndihmon kundër rënies së flokëve duke i ushqyer me proteinat esenciale që forcojnë dhe shtojnë volumin e flokëve. Rrihni një vezë në një enë me pirun. Shtoni një lugë çaji vaj ulliri ose mjaltë, për hidratim, dhe aplikojeni në flokët tuaj si kondicionues pas larjes me shampo. Përqendrohuni në fijet e brishta dhe fundet e këputura të flokëve, për të nxitur riparimin e tyre. Pas 10-20 minutave lajeni kokën dhe aplikoni një kondicionues hidratues. Shpëlajini flokët me ujë të ngrohtë dhe stilizojini si zakonisht.

            E VERDHA E VEZËS ME VAJ ULLIRI

            Merrni të verdhën e një veze dhe 1 lugë gjelle vaj ulliri. Përziejini mirë, me rrahëse vezësh po të dëshironi, ose me duar. Bëni masazh në lëkurën e kokës me majat e gishtave. Lëreni për 10 minuta dhe pastaj lajeni kokën me ujë të vakët. Nëse ky kombinim nuk e irriton kokën, përdoreni një herë në dy ditë. Cilësia e vajit të ullirit është e rëndësishme.

            E VERDHA E VEZËS ME LËNG LIMONI

            Veproni njëlloj si më lart, duke përdorur lëngun e freskët të një limoni në vend të vajit. Ky është bar i njohur ajurvedik kundër rënies së flokëve.

            QUMËSHTI I KOKOSIT

            I pasur me proteina, acide yndyrore esenciale dhe hekur, qumështi i kokosit vepron si stimulues organik për rritjen e flokëve. Ai forcon flokët duke parandaluar këputjen e flokëve dhe zbut flokët. Qumështi i kokosit mund të aplikohet duke e shtuar në shampo dhe kondicionues, ose bëni masazh me të në rrënjët e flokëve. Lëreni 15-20 minuta dhe pastaj shpëlajini flokët me shampo të butë. Qumështit mund t’i shtoni mjaltë ose glicerinë dhe ta përdorni si kondicionues.

            VAJI I KOKOSIT ME LËNG LIMONI

            Vaji i kokosit është ndër vajrat më përdorur për rritjen e flokëve. Ai përmban agjentë anti-mikrobialë që parandalojnë rënien e flokëve për shkak të sulmeve bakteriale dhe kërpudhore / fungale në rrënjët e flokëve. Aplikimi i vajit të vakët të kokosit, i përzier me lëng limoni, në kohën e gjumit lufton zbokthin që shkakton rënien e flokëve. Përgatisni një përzierje me katër lugë gjelle vaj kokosi dhe dy lugë çaji lëng limoni për problemin e hollimit të flokëve. Bëjini masazh lëkurës së kokës me këtë përzierje të paktën 10-15 minuta. Pastaj lëreni përzierjen në kokë për 60-75 minuta, për të pasur efekt më të mirë.
Po kështu, mund të bëni masazh me vajin e kokosit në flokët tuaj të paktën dy herë apo tri herë në javë, për të përmirësuar qarkullimin e gjakut në lëkurën e kokës dhe për të forcuar rrënjët e flokëve.

            ALOE VERA

            E pasur me acide yndyrore esenciale, zink, hekur dhe vitamina A, C dhe E, Aloe Vera shërben si kondicionues natyral sepse nxit rritjen e flokut të ri. Ajo bllokon sekrecionin e tepërt të sebumit, që nxit rënien e flokëve sepse tërhequr baktere, papastërti, pluhur, etj. Nëse përdoret që në fazën e parë të rënies së flokëve, aloe vera mund të nxisë rritjen e flokëve duke i bërë flokët më të fortë dhe të trashë. Në fakt, ajo rrit volumin dhe ndihmon rritjen e flokut me shkëlqim. Përzini dy lugë çaji xhel aloe vera, dy lugë çaji vaj ulliri dhe një lugë çaji mjaltë në 30 gramë ujë të ngrohtë dhe aplikojeni këtë masë në lëkurën e kokës. Lani flokët pas 30 minutave.
            Në raste të flokëve të holluar, fërkojeni lëkurën e kokës me xhel aloe vera dhe disa pika vaj bajameje / bademi. Vetë konsumi i aloe verës përmirëson rritjen e flokëve. Xheli mund të përdoret edhe si kondicionues për flokët.

            MASKA ME AVOKADO

            E pasur në vitaminat B dhe E, avokado forcon flokët dhe riparon flokët e dëmtuar dhe të brishtë. Ajo përmban edhe vajra natyrore dhe yndyrna të monosaturuara që hidratojnë dhe zbusin flokët. Bëni si pure një avokado dhe shtoni të verdhën e një veze dhe një lugë çaji me vaj embrioni gruri. Aplikonjeni masën në flokë të lagur dhe bëni masazh me të në gjithë lëkurën e kokës dhe në flokë. Pas 20 minutave shpëlajeni me ujë të ngrohtë.

            LËNGU I QEPËS

            Qepa njihet për aftësinë e saj kundërt rënies së flokëve sepse hap rrënjët e flokëve dhe nxit rritjen e flokëve të rinj. Ajo vepron si agjent anti-septik që lufton infeksionet fungale / kërpudhore dhe bakteriale që nxisin hollimin dhe rënien e flokëve. Shtrydhni lëngun e pjesës së brendshme të qepës së kuqe dhe filtrojeni. Bëni masazh me lëngun vetëm në lëkurën e kokës dhe lajini flokët pas 10 minutave. Përdoreni këtë çdo ditë për dy javë rresht, për të forcuar flokët dhe për të parandaluar rënien e flokëve. Një mënyrë tjetër e përdorur që në Romën e lashtë: përziejeni lëngun e qepës me mjaltë dhe aplikojeni në flokë. Kjo lehtëson problemet me hollimin e flokëve. Bëjini masazh lëkurës së kokës me tulin e qepës një herë në dy ditë për dy javë.

            SODA E BUKËS DHE E VERDHA E VEZËS

            Nëse keni flokë që ju duken si të pajetë, fërkoni pak sodë buke në lëkurë e kokës në vend të shampos. Kjo heq lëkurën e vdekur në lëkurën e kokës. Më pas, lagini flokët me një përzierje me të verdhë veze, vaj ulliri dhe ujin që është përdorur për të zierë patate. Pastaj mbështillini me një peshqir dhe lërini për 30 minuta. Shpëlajini flokët dhe me siguri do t’ju duken ndryshe. Nëse keni probleme me zbokthin, shtojini përzierjes lëng limoni, ose lëng panxhari.

            BARI POPULLOR RUS KUNDËR RËNIES SË FLOKËVE

            Lajini flokët si zakonisht dhe thajini sa më shumë të mundeni me peshqir. Pas kësaj, aplikoni kripë gjelle mbi rrënjët e flokëve dhe bëni masazh të butë për rreth 15 minuta. Lajini flokët pas masazhit. Përsëriteni këtë procedurë dy herë në javë për 2 muaj rresht. Ndoshta flokët tuaj mund të jenë më të trashë se më parë dhe mund të fillojnë të rriten në vende ku kanë rënë.

            ROZMARINA

            Në mjekësinë tradicionale indiane, rozmarina fërkohet në lëkurën e kokës. Rozmarina lufton inflamacionin që prek lëkurën e kokës dhe flokët. Mund të konsumohet edhe si çaj.

            VAJI I KASTORIT

            Aplikoni vaj kastori me mjaltë (1 lugë çaji) 3-4 herë në ditë për një javë për problemet me hollimin e flokëve. Aplikimi i rregullt i vajit të kastorit ndihmon rritjen e flokut.

            UTHULLA E MOLLËS

            Shpëlarja e lëkurës së kokës me uthull molle pas larjes me shampo ndihmon në rastet e hollimit të flokëve. Përdorni gjysmë gote uthull molle me një gotë ujë të ngrohtë për shpëlarje. Edhe pirja e uthullës së mollës (gjysmë luge çaji në një gotë ujë) 3 deri në 4 herë në javë mund të përmirësojë rritjen e flokëve.

            HITHRA / RRËNJA E HITHRËS

            Në mjekësinë popullore hithra njihet si mbretëresha e bimëve mjekësore, për shkak të efekteve të saj pozitive në shërimin e disa sëmundjeve. Përdorimi i kësaj bime gjatë periudhës së pranverës ndihmon në pastrimin e gjakut dhe te të sëmurët me anemi. Në kozmetikë ndihmon kundër rënies së flokut dhe zbokthit. Personat që kanë probleme me zbokthin u rekomandohet larja e kokës me lëngun që përftohet nga zierja e hithrës. Është mirë që larja të kryhet dy herë në javë dhe të vazhdojë deri në eliminimin përfundimtar të zbokthit. Larja e kokës me ujin e hithrës këshillohet edhe për ata që kanë probleme me rritjen e ngadaltë të flokut.

            BIZELET

            Në formë paste, sepse kanë proteinë, yndyrë, karbohidrate, vitaminë B, që ndihmojnë ndarjen e qelizave të rrënjës dhe daljen e flokëve të rinj.

            Po në rastet kur disa femrave u dalin aty-këtu flokë të thinjur? Për këtë do të shkruaj herë tjetër.

            Ju uroj shëndet, dituri dhe mençuri!